Խորհրդածութիւններ Ազդարարի վերահրատարակման առիթով
Աւելի քան երեք տարիներու դադարէ ետք, ուրախութեամբ կ՚ողջունենք՝ Քուէյթի Հայոց Ազգային Վարչութեանս որոշումով, Առաջնորդարանիս ?Ազդարար? պաշտօնաթերթի կրկին լոյս ընծայումը։
Առ ի գիտութիւն կ՚ուզենք յայտնել, որ թերթիս հրատարակութեան որպէս պատասխանատու նշանակուած է Քուէյթի Հայոց Ազգային Վարժարանիս փոխ-տնօրէն՝ Պրն. Կարօ Արսլանեանը։ Ուստի, յառաջիկայ շաբաթներու ընթացքին աստիճանաբար պիտի ճշտուին բաժանորդագրութեան ձեւերը։ Առ այդ, բոլոր անոնք, որ կը փափաքին անցեալի նման, Առաջնորդարանէն ստանալ ?Ազդարար?-էն տպուած օրինակ մը, կը խնդրենք որ իրենց անունները արձանագրեն Առաջնորդարանիս քարտուղարութեան մօտ. իսկ անոնք որ կը նախընտրեն ուղղակի e.mail-ի միջոցով ունենալ ?Ազդարար?-ի բնագիրը, թող որ բարեհաճին իրենց անունն ու ազգանունը եւ e.mail-ը տալ քարտուղարութեանս։
?Ազդարար?-ի վերահրատարակութեան նախօրեակին կ՚անդրադառնանք, որ ժամանակները փոխուած են այսօր։ Շուրջ տասնըհինգ տարի առաջ, երբ առաջին անգամ սկսաւ լոյս տեսնել ?Ազդարար?-ը թէ՛ օրուան հրատապ հարցերն ու մտահոգութիւնները եւ թէ՛ ?Ազդարար?-ը համայնքի անդամներուն տրամադրելի դարձնելու եղանակները տարբեր էին։
Հայաստանի անկախացումէն եւ Արցախի ազատագրումէն ետք, թէ՛ հայրենիքի եւ թէ՛ սփիւռքի մէջ շատ բան փոխուած է։ Համաշխարհայնացումի պատճառով, հաղորդակցութեան իմաստով, այս օրերուն երկրագունդը վերածուած է գիւղի մը, ուստի, այնպիսի արագութեամբ եւ առատութեամբ մեզի կը հրամցուին այնքա՜ն խայտաբղէտ տեղեկութիւններ, որոնց օգտակար կամ վնասակար ըլլալը դժուար է որոշել։
Արդարեւ, այս իրողութեան որպէս հետեւանք, անոնք որ ներկայիս հետաքրքուած են Հայստանի, Արցախի, սփիւռքի եւ առ հասարակ հայութեան առնչուող լուրերով, Հայաստանի 24 ժամերու վրայ տարածուած հեռատեսիլի կայանէն բացի, համացանցի ընծայած դիւրութեան շնորհիւ, կրնան հեշտութեամբ կարդալ զիրենք շահաքրքրող բոլոր նիւթերու մասին։ Նոյնպէս սփիւռքահայ մամուլը ու տակաւին բազմաթիւ Կայքէջեր շարունակաբար մեզի տեղեակ կը պահեն հայ իրականութեան վերաբերող անցուդարձերուն։
Հայաստանի թէ Արցախի, Ռուսաստանի թէ Լեհաստանի, Լիբանանի թէ Եւրոպայի, Ամերիկայի կամ Չինաստանի մէջ ապրող հայը, եթէ կը տագնապի իր հայութեան ինքնութեան պահապանումով, այլեւս կարիքը չունի սպասելու նամակատունէն երկար ուշացումով իրեն հասնելիք թերթերուն։
Այսուհանդերձ, մենք կը հաւատանք, որ Առաջնորդարանիս ?Ազդարար? պաշտօնաթերթը, այս բոլորին առընթեր, տակաւին ունի իւրայատուկ դերակատարութիւն մը։
Բնականաբար ամէն մարդ ո՛չ ժամանակը եւ ո՛չ ալ հնարաւորութիւնն ու կարողութիւնը ունի օգտուելու վերոյիշեալ աղբիւրներէն։ Ուստի ?Ազդարար?-ը կրնայ բաւարարել անոնց հետաքրքրութիւնը, դիւրացնել անոնց գործը, հետեւեալ կերպով։
Առաջին՝ տալով համառօտ լուրեր Հայաստանէն եւ Արցախէն, որոնք կը հետաքրքրեն ամբողջ հայութիւնը։
Երկրորդ՝ հաղորդելով սփիւռքի զանազան գաղութներու մէջ հայապահպանման գծով եւ հայկական պահանջատիրութեան նպատակով թափուած ճիգերու վերաբերեալ տեղեկութիւնները։
Երրորդ՝ ?Ազդարար?-ը կրնայ հայելին դառնալ Քուէյթահայութեան, ինչու չէ նաեւ թեմիս այլ շրջաններու կրօնական ու ազգային, կրթական ու մշակութային գործունէութեան, պարբերաբար արծարծելով իւրաքանչիւր շրջանի դիմագրաւած մարտահրաւէրները։
Եթէ յաջողի հետեւողականօրէն հետապնդել եւ գէթ մասամբ իրագործել այս նպատակակէտերը, այն ժամանակ ?Ազդարար?-ը կ՚արդարացնէ իր վերահրատարակութեան իմաստը։
Յամենայն դէպս, աւելի լաւ է փորձել, քան հաշտուիլ կրաւորականութեան եւ կղզիացման իրավիճակին հետ, ինչպէս դարերու իմաստութիւնն ու մեր խիղճը կը յուշեն մեզի, ?աւելի լաւ է մոմ մը վառել խաւարին մէջ եւ լուսաւորել շրջապատը, քան թէ անիծել խաւարը…?։
Մնամ օրհնաձայն սիրոյ ողջունիւ,
ջերմօրէն աղօթարար՝
ԿՈՐԻՒՆ ԱՐՔ. ՊԱՊԵԱՆ
ԿԱԹՈՂԻԿՈՍԱԿԱՆ ՓՈԽԱՆՈՐԴ
Աղբիւր՝ ?Ազդարար? ՏԵՂԵԿԱՏՈՒ ԱՌԱՋՆՈՐԴԱՐԱՆԻ ՀԱՅՈՑ ՔՈՒԷՅԹԻ ԵՒ ԱՐԱԲԱԿԱՆ ԾՈՑԻ ԵՐԿԻՐՆԵՐՈՒ ԹԵՄԻՆ, ՆՈՐ ՇՐՋԱՆ, Ա. Տարի, Թիւ 1, 06 Յունուար 2009
