Բողոքի հաւաք Քուէյթի մէջ

Հայաստան ? Թուրքիա արձանագրութիւններուն մասին ժողովրդային բողոքի հաւաք Քուէյթի մէջ

9 Հոկտեմբեր 2009ին, երեկոյեան ժամը 8:00ին, Քուէյթի Սրբոց Վարդանանց եկեղեցւոյ մէջ տեղի ունեցաւ Հայաստան ? Թուրքիա արձանագրութիւններուն մասին ?Ժողովրդային Բողոքի Հաւաք?, հովանաւորութեամբ Թեմիս Կաթողիկոսական Փոխանորդ՝ Գերաշնորհ Տէր Կորիւն Արք. Պապեանի եւ կազմակերպութեամբ Քուէյթի Հայ Դատի Յանձնախումբի:

Հաւաքի բացումը կատարեց Յանձնախումբիս անդամ՝ Օր. Դալար Գալէմքեարեան։ Ան իր բացման խօսքին մէջ անդրադառնալով ամօթալի արձանագրութիւններուն, դատապարտեց անոր ստորագրումը։

Հաւաքի ընթացքին, առաջին խօսք առնողն էր, Քուէյթի եւ Արաբական Ծոցի Երկիրներու Թեմական Խորհուրդի անդամ եւ Հայ Դատի յանձնախումբի անդամ՝ Պրն. Պօղոս Մարտիրոսեան։ Ան իր ելոյթի ընթացքին բաւական ընդարձակ տեղեկութիւններ փոխանցեց Հայ-թրքական յարաբերութիւններուն մասին. Պատմական ակնարկներով ներկայացուց այդ յարաբերութեանց զարգացման հանգրուանները։ Պրն. Մարտիրոսեան իր խօսքին մէջ անդրադարձաւ ըսելով.- ?Խորքին մէջ արձանագրութիւնները կը ներառեն ո՛չ թէ Թուրքիոյ կողմէ առաջադրուած քանի մը նախապայման, այլ՝ բազմաթիւ նախապայմաններ, որոնց կարգին է պատմաբաններու յանձնաժողովի կազմութիւնը, որով կը չէզոքանան Ցեղասպանութեան ճանաչման, դատապարտման եւ հետեւանքներու յաղթահարման խնդիրները. հոն կայ Կարսի պայմանագրի հաստատումը, եւ ոչ միայն Կարսի, այլ Լոզանի դաշնագրի ստուերին տակ ըլլալը?։ Ապա իր ընդվզումն ու բողոքը արտայայտեց իր Ո՛Չ-ով։

Talar Kalemkerian

Սոյն հաւաքին իր մասնակցութիւնը բերաւ նաեւ՝ Քուէյթի եւ Արաբական Ծոցի Երկիրներու Թեմական Խորհուրդի անդամ՝ Պրն. Յարութ Պէտերեան, որ ներկայացուց իր տպաւորութիւնները Հ.Հ. նախագահի ՀԱՄԱՀԱՅԿԱԿԱՆ ՈՒՂԵՒՈՐՈՒԹԵԱՆ ընթացքին Պէյրութի մէջ կայացացած հանդիպումի մասին։ Ան զեկոյցի ընթացքին ընթերցեց իր արտասանած խօսքը՝ ուղղուած Հ.Հ. նախագահին եւ պատասխանեց ներկաներու հարցումներուն, տալով անհրաժեշտ լուսաբանութիւններ։

Յիշենք նաեւ, որ հաւաքի ընթացքին ցուցադրուեցան ամփոփ տեսանիւթեր՝ Հ.Յ.Դ. Բիւրոյի ներկայացուցիչ՝ Ընկ. Հրանդ Մարգարեանի՝ թղթակիցներու հետ ունեցած հանդիպումէն, Լիբանանահայութեան բողոքի ցոյցերէն, Հ.Հ. նախագահի ՀԱՄԱՀԱՅԿԱԿԱՆ ՈՒՂԵՒՈՐՈՒԹԵԱՆ՝ Պէյրութի մէջ կայացացած հանդիպումէն, Հ.Հ. Ազգային Ժողովի նիստերու ընթացքին ելոյթ ունեցող պատգամաւորներուն քննադատական ելոյթներէն։

Archbishop Goriun Babian

Հաւաքի աւարտին խօսք առաւ Քուէյթի եւ Արաբական Ծոցի Երկիրներու Թեմի Կաթողիկոսական Փոխանորդ` Գերշ. Տ. Կորիւն Արք. Պապեան, որ իր խօսքին մէջ ընդգծեց՝ ?Ի տես Հայաստանի Կառավարութեան կողմէ ցուցաբերուած զիջումի վտանգաւոր քաղաքականութեան, հայ ժողովուրդի արդար իրաւունքներու ոտնահարման, Արեւմտեան Հայաստանի մեր հողային պահանջատիրութենէն հրաժարելու իրողութեան, մենք մեր բողոքը կը ներկայացնենք ու պիտի շարունակենք բարձրաձայն աղաղակել Ո՛Չ- Ո՛Չ- Ո՛Չ?։ Ապա շեշտեց՝ ?Մեր խոր համոզումն է, որ հայ ժողովուրդին պարտադրուող այս փաստաթուղթի ընդունումն ու գործադրութիւնը իր աղէտալի հետեւանքները պիտի ունենայ հայ ժողովուրդի միասնականութեան եւ մեր իրաւունքներու ձեռք բերման համար թէ՛ օրինական եւ թէ՛ գործնական գետնի վրայ, եթէ շուտով չկասեցուի այն?։

Խօսքի աւարտին, կարեւորութեամբ ներկաներու ուշադրութեան յանձնեց հետեւեալ պարագան։ ?Մեր բողոքը բարձրաղաղակ յայտարարելէ ետք, զգուշ պէտք է ըլլանք, որպէսզի Հայաստանի եւ սփիւռքի հայութեան միջեւ մեր ունեցած միասնակամութիւնը չխախտի։ Թուրքին ուզածն ալ այդ է արդէն. Հայաստանի եւ սփիւռքի հայութեան միչեւ ճեղք յառաջացնել եւ այդ ձեւով տկարացնել մեր արդար դատի պահանջատիրութեան յաղթական երթը?։

Հաւաքը աւարտած էր, բայց մեր պայքարը դեռ պիտի շարունակուի ապագային։

ԱԶԴԱՐԱՐ ՏԵՂԵԿԱՏՈՒ ԱՌԱՋՆՈՐԴԱՐԱՆԻ ՀԱՅՈՑ ՔՈՒԷՅԹԻ ԵՒ ԱՐԱԲԱԿԱՆ ԾՈՑԻ ԵՐԿԻՐՆԵՐՈՒ ԹԵՄԻՆ
ՆՈՐ ՇՐՋԱՆ, Ա. Տարի, Թիւ 30, Ուրբաթ, 23 Հոկտեմբեր 2009