Suzanne Khardalian from Sweden points out to the 1.1 million immigrants who left Armenia in the past one and half decades and found new homes in Russia, USA, Ukraine and other countries. She says that this is the second demographic catastrophe Armenia is facing after the Genocide in 1915. She criticizes the current rulers of Armenia who place their individual interests over national interest and are adamant in continuing the rule of nepotism and totalitarianism.
Կա՛մ ջայլամի քաղաքականութեան պերճանքը
?Հայաստանի կառավարութիւնը մտահոգուած է բնակչութեան արտագաղթի մակարդակով եւ քայլեր է ձեռնարկում այն կրճատելու ուղղութեամբ?:
Այս մասին յայտարարած է Հայաստանի վարչապետ Տիգրան Սարգսեանը Փետրուարի 25ին երկրի հեռուստաընկերութիւններու ներկայացուցիչներուն տուած իր հարցազրոյցին մէջ:
?Իհարկէ, միգրացիոն ծառայութիւնից ստացուած թուերը մեզ մտահոգում են: Այդ պատճառով մենք հաստատել ենք յատուկ ծրագրեր՝ ուղղուած արտագաղթի մակարդակի նուազմանը եւ բարենպաստ պայմանների ստեղծմանը այն հայրենակիցների համար, ովքեր ցանկութիւն կը յայտնեն վերադառնալ հայրենիք?, ըսեր է վարչապետը:
Անկեղծ ըսած վարչապետ Տիգրան Սարգսեանի այսքան հանգիստ վերաբերմունքը, սառնասրտութիւնը ուղղակի զիս կը շշմեցնէ: Նոյնիսկ շուէտացին նախանձով պիտի զմայլէր մեր վարչապետի այս պահուածքին վրայ:
Պաշտօնական տուեալներու համաձայն՝ Հայաստանէն հեռացածներու թիւը սկսած 1992 թուականէն մինչեւ 2010թ. Յուլիս, կը կազմէ 1-1,1 միլիոն մարդ:
Գաղթականական պետական ծառայութեան տուեալներով՝ արտագաղթողներու 65 տոկոսը որպէս հիմնական բնակութեան վայր ընտրած է Ռուսիան, երկրորդ կարգի վրայ կու գայ ԱՄՆը իսկ երրորդ՝ Ուքրանիան:
Հայաստանէն հեռացող տղամարդոց թիւը գրեթէ երկու անգամ աւելի է, քան կանանց թիւը: Մեկնողներու հիմնական մասը աշխատունակ տարիք ունի, այսինքն՝ 30-50 տարեկան մարդկանց մասին է խօսքը:
Մէկ միլոն հայեր լքած են իրենց հայրենիքը:
Թէ այս ահաւոր հսկայական թիւ ներկայացնող զանգուածի քանի տոկոսը կը վերադառնայ հայրենիք, ցոյց կու տայ ապագան.
Պահ մը կը փորձեմ սառնասրտութեամբ մօտենալ այս ահաւոր թուանշանին. կը նկատեմ որ լրատուութիւնը կ՛ըսէ 1.1 մլն. մարդ կրճատումով. 1.1 մլն. մեկնողներ:
Եկենք բանանք թիւը. Մէկ միլիոն հարիւր հազար մարդ :
1,100, 000 հայեր: Մեկնողնե՞ր: Ինչի՞ մասին է խօսքը. Այս մարդիկ թուրիզմի չեն մեկնած, չէ՞: Այնտեղ նաեւ կ՛օգտագործուի միգրանդ բառը:
Եւ ի՞նչ է հայրենի կառավարութեան հակազդեցութիւնը՝ ?Արտագաղթի մակարդակը մտահոգում է Հայաստանի կառավարութեանը?.
Սակայն այսօր սատանան կ՛ուզէ զիս փորձութեան մատնել: Աւելին. չեմ գիտեր ինչու պատրաստ եմ փորձութեան ենթարկուելու: Միտքս կ՛աշխատի միայն մէկ ուղղութեամբ. թիւերու զուգորդութիւն:
Մէկ միլիոն թիւը հայ մարդուն համար յատուկ նշանակութիւն ունի: Միլիոնը մեքենաբար իմ եւ իմ ազգակիցներուս մէջ կ՛արթնցնէ ուրիշ մէկ բան. բոլորս մեքենաբար կը յիշենք Հայոց Ցեղասպանութիւնը, 1.5 միլիոն հայեր կոտորուեցան իրենց դարաւոր հայրենիքի հողին վրայ՝ յաւիտենապէս հեռանալով անկէ, հարիւր հազարաւորներ տարագրուեցան օտար ափեր: Հարիւր տարուայ ընթացքին մենք վճառեր ենք երկու հսկայական մարդկային տուրք. Առաջինը Ցեղասպանութեան ընթացքին, երկրորդը այս վերջին տասնամեակին:
Իւրաքանչիւր անգամ տարածաշրջանէն հայերու հսկայական համրանքի մը վերացումով: Տրամաբանութիւնս կը յուշէ որ մենք մեր ձեռքով նաեւ ներգործօն կերպով կը նպաստենք 19րդ դարէն գործի դրուած մեծ եւ շրջանային տէրութիւններու ?Հայաստան առանց հայերու? քաղաքականութեան իրականացման:
Ինչու կը հեռանան մարդիկ իրենց հայրենիքէն հարցումին պատասխանի փնտռտուքը ոչ միայն ուշացած է այլեւ անիմաստ. իսկ այդ հարցով վարչապետի մտահոգուիլը՝ միայն ծիծաղելի:
Հրամայականները յստակ են:
Եթէ Հայաստանի այսօրուան ղեկավարութիւնը իսկապէս մտահոգուած է Հայաստանի հանրապետութեան եւ Լեռնային Ղարաբաղի բնակչութեանց ճակատագրով եւ մտադիր է հնարաւորութեան սահմաններուն մէջ առաւելագոյն չափով պահպանել մեր պետականութեան արտաքին քաղաքականութեան ինքնուրոյնութիւնը, ապա ան պարտաւոր է սեփական ժողովուրդի առջեւ առաջին հերթին ճանչնալ եւ ամենակարճ ժամկէտին սրբագրել, դադրեցնել տարիներէ ի վեր ներքին քաղաքական կեանքին մէջ տիրող սանձարձակութիւնները: Ապա՝ վերանայիլ հայրենքի մէջ իրականացուող սոցիալ-տնտեսական քաղաքականութիւնը: Երրորդ՝ մեղմացնել հասարկութեան մէջ անհանդուրժելի աստիճանի հասած սոցիալական անհաւասարութիւնը սոցիալական հաւասարութեան նոր սկզբունքներու ներդրումով, եւ չորրորդ՝ ամէնէն կարեւորը, վերականգնել հասարակութեան մեծամասնութեան մօտ կենսագործունէութեան ընդունակութիւնը, աշխատանքի նոր տեղերու ստեղծումով:
Մինչեւ այն ատեն որ չի մաքրուիր նեպոթիզմով յագեցուած ներքին մթնոլորտը, երբեք հնարաւոր պիտի չըլլայ իրականացնել հայանպաստ արտաքին քաղաքականութիւն, առաւել եւս ներկայ համաշխարհային պայմաններուն մէջ հնարաւոր պիտի չըլլայ պաշտպանել մեր ազգային հիմնահարցերը: Այս մասին արդէն անցեալ շաբաթ ահազանգեց Վահան Յովհաննիսեանը ?Եւրոնեսթ?ի աշխատանքներու մեկնարկման առիթով:
Միջազգային յարաբերութիւններու եւ դիւանագիտութեան պատմութիւնը արձանագրած է, որ միշտ կը պարտուին այն պետութիւններն ու ժողովուրդները, որոնք արտաքին քաղաքական կամ ազգային խնդիրները կը դարձնեն ներքաղաքական շահարկման առարկայ:
Երբ ականջ կը դնես քաղաքական իրադարձութիւններուն լսելու համար թէ ուր կ՛երթայ մեր հայրենիքը, արձագանգը կը յուշէ միայն մէկ բան. գործող նախագահն ու անոր շրջանակները յստակ կատարած են իրենց ընտրութիւնը՝
Ա.- Իշխանութեան պահպանումը եւ անոր ժառանգականութեան ապահովումը գեր-խնդիր է իրենց համար.
Բ.- Քաղաքական, ֆինանսական, տնտեսական եւ այլ շահերը վեր կը դասեն համազգային ձգտումներէն:
Գ.- Ամբողջատիրութեան պահպանման համար պատրաստ են հետեւողականօրէն ոտնահարել ժողովրդավարութեան տարրական նորմերը:
Եկէք համաձայնինք որ այս երեւոյթը կործանարար է այսօր ամբողջ հայութեան համար:
Փաստօրէն Քոալիսիոնի նոր եւ վերջին յայտարարութիւնները կը գուժեն ժողովրդավարութեան մահը Հայաստանի մէջ.
Կ՛ուզեմ լաւատես ըլլալ, սակայն անհիմն լաւատեսութիւնը ջայլամի մտայնութիւն է: Միամտութիւն է կարծել, թէ հայկական գործօնի շահարկումը մօտիկ ապագային պիտի կարենանք յաղթահարել: Այդ շահարկումը տեղի պիտի ունենայ ոչ միայն Լեռնային Ղարաբաղի խնդրով զիջումներ կորզելու ենթատեքստով այլ շատ աւելիով: Մեր իշխանութիւններէն կը պահանջուին եւ պիտի պահանջուին բազմաթիւ մեծ ու փոքր ծառայութիւններ, որոնց ծանր հետեւանքները բնականաբար պիտի կրէ հայ մարդը, քաղաքացին, եւ վերջին հաշուով ողջ հայութիւնը՝ ընդհանրապէս:
Այսօր ամբողջ աշխարհը շունչը բռնած կը հետեւի որ ինչպիսի վճռականութեամբ Միջին Արեւելքի ամբողջ տարածքին շարքային քաղաքացին փողոց կ՛իջնէ իր տարրական իրաւունքները պաշտպանելու համար, իսկապէս անհասկնալի եւ անըմբռնելի է որ մեր հայրենակիցները իրենց առօրեան յուզող հարցերու լուծումը կը տեսնեն երկրէն վերջնականապէս մեկնելու արմատական քայլին մէջ:
Եկէք պահ մը ձերբազատուինք զգացմունքային աւելորդութիւններէ եւ յաղթանակի առասպելաբանութիւններէն եւ պիտի տեսնենք՝
Որ բոլորիս առջեւ արեւի պէս կը փայլի պարզ ճշմարտութիւնը. սպառած են արդարացման բոլոր փորձերը, յատկապէս սփիւռքահայութեան կողմէ այս էական եւ սկզբունքային բարոյական հարցին՝ ոտնձգութիւնները չտեսնելու, մատներու արանքով անոնց նայելու արդարացումները:
Որ արդէն վճառած ենք շատ բարձր գին՝ 1.1 միլիոն հայերու հեռացումով:
Որ Սխալ բան մը կայ.
Որ կանգնած ենք հոգեւոր եւ բարոյական անկման շեմին:
Որ աչքերը փակելով հարցերը լուծելու պերճանքը եւ շռայլութիւնը այլեւս չունինք:
Սթոքհոլմ
Source: Asbarez, 01 March 2010
http://asbarez.com/arm/93456/
Additional reading in Azad-Hye:
Suzanne Khardalian visits UAE and presents one of her movies to Armenian audience in Sharjah
Review of two films by Suzanne Khardalian and Rea Holmquist
Photo by Azad-Hye
